得數據者得天下，講求big data嘅世代，你網上嘅一舉一動其實都俾人追蹤。與此同時，大家又越來越重視私隱，如果有一日好似cookies咁嘅追蹤工具唔可以再用，marketer又可以靠啲咩去了解客戶行為？
你有咩數據畀人track 緊？
我地可以先了解其實客戶有咩資訊係俾互聯網track住。企業收集消費者嘅數據，大致可分成四類。
- 個人數據（Personal Data）
個人數據又可以再細分為個人可識別資訊（Personally Identifiable Information/ PII） ，例如係姓名、出生日期、登入資料等；以及非個人可識別資訊（Non-Personally Identifiable Information/ Non-PII），例如係IP地址、瀏覽器cookies、設備ID，就好似究竟你係用電腦、電話定平板等等。
- 參與度數據 （Engagement Data）
用戶點樣同網站、訊息、軟件、社交媒體、電子郵件、同付費廣告嘅互動，包括點擊等等。
- 行為數據（Behavioral Data）
行為數據包括交易（transaction）細節，例如購買歷史（purchase history）、平均購物消費（average order value）同量化數據，就好似係鼠標移動、點擊次數、頁面捲動等等 。你甚至可以追蹤用戶嘅產品使用習慣，例如使用頻率同不同feature嘅使用次數。
- 態度數據（Attitudinal Data）
包括消費者滿意度、購買標準、購買意慾等指標。
Marketers又或大企業點樣追蹤你嘅數據？
講到追蹤數據大家最熟悉嘅一定係cookies啦！佢係一個純文字型嘅檔案，原意係令你睇網站時更流暢﹐所以喺網站伺服器（Web Server）儲存你所用嘅瀏覽器嘅部分資訊（例如ID或瀏覽紀錄），下次你再上翻嗰個網，cookies就會透過瀏覽器遞交資訊畀給server。Cookies可以記低你上次填嘅姓名、電話、地址、身份證號碼、 信用卡號碼、密碼等，但記得太多，就等同有洩漏個人資料嘅風險。
收集數據其實仲有好多渠道架！例如Google Analytics、Mixpanel同Piwik PRO都係網站行為追蹤軟件，另外marketer熟悉嘅Facebook Pixel就用像素追蹤代碼嚟追蹤Facebook用戶嘅行為記錄，Firebase就係用嚟追蹤app上嘅活動。值得一提嘅係，呢啲都係第三方數據（Third-party data）。
得到資訊後，Marketer就可以將數據轉化為insights，例如透過Segmentation（市場區隔），更精準地設計營銷策略。
用追蹤軟件嘅道德難題
好似Cookies呢類嘅第三方數據多年嚟都係marketer嘅好幫手，但係喺私隱越來越重要嘅年代，追蹤軟件帶嚟好多道德嘅疑問，主要係追蹤嘅過程係相當唔透明，同收集得太多資料，而數據濫用同違規嘅新聞都久唔久都會出現。有見及此﹐未來嘅趨勢會係減少對tracking工具嘅倚賴，例如Google已經宣佈逐步淘汰Chrome 瀏覽器支援第三方Cookie 功能。
自己數據自己Track
一旦進入咗唔可以再靠第三方數據嘅年代，企業就要用第一方數據（First-party data）嚟定位用戶，而擁有最多第一方數據的人，就會做得最好。所以呢個其實係一個極佳嘅時機，投資落客戶關係管理（CRM），咁就可以喺自家平台，收集一手數據，擬定度身訂造嘅營銷策略。
負責任地蒐集數據
作為負責任嘅企業或者機構，其實有唔少方法可以更有道德、更負責任地使用追踪軟件，蒐集數據，以下都係一啲可以參考嘅方法。
- 坦誠相對
俾用戶知道你用緊咩嚟track佢，如果你個網站係用cookies收集數據，旗幟鮮明咁喺網站度寫清楚 ，知情權係用戶應有嘅權利。
- 清楚易明嘅條款
俾客戶一個易於理解同接受嘅保護私隱條款聲明，保證條款係有約束力嘅，令客戶確信佢哋嘅個人數據唔會出賣俾第三方。
- 披露企業保護數據嘅方式
你公司用咩方法去保護客戶數據？係咪符合GDPR通用數據保護條例嘅標準？如果發生任何數據洩露，你會點樣幫受影響嘅顧客？你講得越多，用戶就會越安心。
- 用戶有選擇嘅權利
客戶有無辦法可以調整私隱選項？網站可以關閉cookies嗎？電郵可以「取消訂閱」（opt-out）嗎？俾客戶選擇嘅權利，都係令蒐集數據更道德嘅方式。
參考資訊：