講起社交媒體營銷（social media marketing），好多人都只係會諗起喺Facebook、Instagram、Linkedin 同 Twitter配合圖像出一啲同產品或者業務有關嘅帖子，但其實製作影片做宣傳都係一種有效嘅市場推廣手法嚟架。YouTube作為繼Google後最多瀏覽量嘅網站，都係一個好值得大家利用嘅平台。由Youtube高達20億嘅活躍用戶，可見影片對大眾嘅吸引力！
唔知點開始好？唔緊要，以下係五個影片營銷嘅策略，等你可以成功咁用影片去宣傳你嘅品牌啦。
1. 推出具內容行銷元素嘅影片
內容營銷（content marketing）係近排好流行嘅行銷策略，透過上載同品牌有關、有趣、且具資訊性嘅內容喺你嘅社交媒體，以從容不迫嘅方式間接地宣傳公司嘅品牌。早前同大家分享集客式行銷（inbound marketing）策略嘅時候，我哋提及過其實內容營銷同社交媒體營銷係相符相成嘅，事實上，除左傳統配合圖像出嘅帖子之外，影片都可以包含內容營銷嘅元素架！
市區重建局嘅業務主要包括樓宇復修及保育等等，喺佢哋嘅官方Instagram上面，我哋可以見到唔少關於樓宇保養嘅教育影片，為觀眾提供不同種類嘅樓宇保養資料。當中影片大多以短篇劇集嘅形式，有趣地教育大眾樓宇復修嘅小知識。
著名大型補習社遵理學校喺影片上嘅內容營銷亦有一手。佢哋主要喺Facebook發佈一啲訪問中學生嘅街訪片段，內容主要圍繞校園生活、中學文憑試及補習趣事等等，成功吸引唔少學生關注，遵理學校嘅知名度亦都因而提升。
由此可見，其實做影片營銷所推出嘅影片唔一定係直接同硬性咁推廣產品，以同自身品牌相類近嘅內容做題材，但要緊記影片要做到夠引人入勝，先可以賺到可觀嘅觀看率（views）架。
2. 開啟直播視頻
唔知大家有冇留意到越嚟越多公司都開始喺社交平台上進行直播（live streaming），至於點解會有一個咁嘅趨勢呢？誠如Hey Digital嘅聯合創始人兼首席執行官Dylan Hey曾經講過：「直播可以用作建立你嘅品牌，同受眾建立更深層次嘅聯繫，並支持銷售流程同銷售週期。」的確，進行直播視頻嘅最大優勢就係可以促進真人互動同埋同觀眾進行交流，去收窄距離感。
以KKBox香港為例，每次當有一啲流行歌手推出新嘅派台歌曲，佢就會邀請唔同嘅歌手上嚟拍片直播、介紹新歌，甚至係玩遊戲同舉辦小型音樂會，咁樣一方面可以推廣歌曲，另一方面亦都可以吸引更多樂迷係KKbox聽歌。
除咗本地公司，其實為人所熟識嘅跨國企業Apple嘅發佈會都係喺Youtube以直播形式舉行架！相信將來幾年假設疫情持續，企業更依賴網上渠道同潛在客戶（leads）溝通嘅時候，直播只會喺社交媒體更普及。
3. 同網絡紅人或行業領袖合作
影響者營銷（influencer marketing）指透過網絡紅人（KOL）嘅影響力去進行推廣，提升大眾對你品牌嘅意識（brand awareness）。
影響者營銷其實都可以配合影片營銷一齊做宣傳架，最簡單嘅方法就係同關鍵意見領袖（Key Opinion Leader）合作推出影片啦。本地Youtuber波仔就曾經受到各大品牌邀請，希望喺佢嘅Youtube channel發佈同品牌內容有關嘅影片。喺波仔同日本服裝品牌GU合作嘅影片中，佢就以衣帽間為主題，為GU嘅奧海城新店進行宣傳。GU仲送出五張現金券俾波仔轉贈俾觀眾，最終有超過800位觀眾留言參加呢個giveaway。
可能你會問：影片營銷唔係一般都係喺自己公司嘅頻道發佈影片㗎咩？其實從呢個案例可以睇到，比起邀請網絡紅人去拍攝硬性宣傳嘅廣告，而喺合作時候給予自由度俾佢哋係自己嘅Youtube channel創作影片，宣傳效果可能更佳。
除咗同呢啲KOL合作，同唔同嘅行業領袖（Industry Leader）進行面試並且拍攝成為短片亦都係另一種大熱嘅影片營銷方法。講到明行業領袖，當然可以令你嘅影片更具公信力，同時加強潛在客戶對你公司嘅信任。
香港科學園就曾經邀請CryptoBLK.io嘅創辦人王世松先生（ Mr. Duncan Wong）拍攝專訪片段，同商界領袖嘅合作令香港科學園嘅片段更有權威，亦都令內容更豐富。
4. 製作動畫視頻
動畫一般以生動有趣嘅方式呈現，所以動畫影片總有一種吸引觀眾嘅力量，呢一點可以話係無與倫比。更重要嘅係，動畫能夠簡化一啲難以理解嘅概念，有研究指出有90％傳遞到大腦嘅信息係視覺信息，所以其實動畫可以令到資訊更易入口架。動畫影片有好多唔同種類，而幾乎所有類型嘅影片都可以以動畫形式製作。
咁多種入面，當中白板動畫動畫（whiteboard animation）同埋資訊圖表動畫（infographic animation）較為熱門。前者特別適合解釋複雜嘅概念，呢類動畫通常包括一個實況動作元素，例如有一隻手喺影片入面不斷喺白板上繪製出畫面。呢一個元素可以引導觀眾轉移注意力，所以即使影片較長，都可以令觀眾專心睇曬，所以尤其喺解釋一啲複雜嘅產業時非常有用，例如係比較技術性嘅產品同服務。但如果你想介紹包含大量數字嘅內容時，後者就較為適合你啦，資訊圖表動畫有助複雜嘅數據變得更易入口。
5. 製作 360 度全景視頻
360度全景影片亦被稱為沈浸式影片（immersive videos）或球形影片（spherical videos），可以同時記錄一個地方入面向唔同方向拍攝嘅影片。呢種影像雖然係好特別，不過佢對拍攝用具比較有要求，通常需要使用特殊嘅多台攝像機或者可以嵌多個攝像機鏡頭嘅專用攝像機嚟錄製，同時拍攝重疊嘅角度。最後透過一種稱為影片拼接嘅方法，將所有素材合併成為一個全方位嘅片段。當然，大家要注意校準每個鏡頭嘅顏色同對比度，令所有鏡頭呈現一致嘅畫面。
就好似香港航空咁，佢哋曾經推出過一段宣傳影片去推廣佢哋嘅商務客艙，俾觀眾可以全方位咁體驗乘坐商務艙嘅感覺，片段中仲有空姐服務顧客嘅畫面，令現實感大增。
影片營銷係喺數位行銷（digital marketing）入面不可或缺嘅一環。相信只要運用上述提及嘅五大策略，大家都可以成功以影片進行市場推廣。順帶一提，如果大家係Youtube上載影片，記得喺片段嘅尾聲講一啲呼籲字句（call to action）去提高轉換率（conversion），例如叫觀眾讚好、留言同訂閱你嘅頻道，咁先可以最大化你影片嘅效益架！