於過去幾年，營銷嘅方式經歷左好大嘅改變，互聯網、社交媒體、各種新科技嘅出現開創左好多嶄新嘅機會比營銷人員。值得留意嘅係，你覺得自己多左機會做營銷嘅時候，唔好唔記得其實你嘅對手同時擁有相同嘅機會，所以我哋仍然要諗辦法令你做嘅一切變得更加有效率同效果。
依家，市面上有唔少軟件都專程為行銷而設嘅，有啲可以幫你推廣營銷活動、有啲可以幫你管理客戶關係、有啲可以幫你分析數據…呢啲其實都係行銷自動化（Marketing Automation）嘅一種。行銷自動化即係利用軟件工具代替你嘅行銷人員做曬所有人手、日常、不斷重複嘅營銷工作。我哋有時做到攰，真係會眼花架。電腦就唔同啦，佢哋唔會犯呢啲人類嘅錯誤，每件事都可以做得更精準。有佢哋幫手，咁你就可以專注係解決更高層次嘅問題啦！雖然聽落去好似好複雜咁，不過其實呢啲軟件嘅功能不外乎都係呢幾樣：
- 客戶關係管理 (Customer Relationship Management)
客戶關係管理姐係我哋成日聽嘅CRM，可以幫你管理公司嘅關係，包括潛在客戶同現有客戶。客戶忠誠度對一個品牌黎講非常緊要，亦係你可以喺咁咁多對手之中突圍而出嘅竅妙，留客仲要比起拉客更加有成本效益添！做生意嘅大家都似乎都慢慢發現到CRM嘅重要性，原來超過9成超過11個員工嘅公司已經擁有一個屬於自己嘅CRM啦！
- 潛在客戶管理（Lead Management）
呢啲軟件亦都可以幫你集合唔同渠道獲得嘅潛在客戶，根據唔同準則將佢哋分類，甚至可以分配比合適嘅銷售人員，然後幫你計畫埋跟進嘅營銷活動，務求將你嘅客戶拉入銷售漏斗（Sales Funnel）嘅深層。
- 營銷活動管理（Campaign Management）
一句講晒，其實就係幫你創建、追蹤、分析所有營銷活動，比如話新產品發布、活動推廣等等。
- 電郵營銷（Email Marketing）
平日，你send一封EDM（Electronic Direct Mail）要搞幾耐呢？你揀啱軟件嘅話，其實三兩下就可以預定一封email係幾時send、同埋send比邊個。之後，你更加可以睇翻你呢個email嘅表現添，就好似係呢封email嘅開信率（Open Rate）、點擊率（Click Through Rate）、退訂率（Unsubscribe）等等。
- 社交媒體營銷（Social Media Marketing）
社交媒體可以提高客戶對你品牌嘅認知，同時其實可以不知不覺間同客戶建立更深厚嘅關係。但係小編都明呀，更新社交媒體嘅工作其實同send email一樣咁反復單調，每日都要逐個平台登入逐個post上傳，其實都好浪費時間架。用左呢類型嘅軟件就可以幾下schedule定，仲可以一次過睇晒同一個post係所有平台嘅表現添。
- 分析及匯報（Data Analysis and Reporting）
我哋上面多次提及分析、資料、表現呢啲字眼，因為呢啲數據對於你嘅生意嘅發展黎講真係好重要架！從以上嘅數據，你可以計算自己嘅ROI（Return On Investment），等你對自己嘅生意有更深入嘅了解。唔少軟件會有自己嘅儀表板（Dashboard）匯報跳離率（Bounce Rate）、轉換率（Conversion）等等數據。
其實久而久之，你會有一班更忠實嘅客戶，對佢哋亦會有更深入嘅了解，第日假設你要搞營銷活動嘅時候，至少你會知道你target邊一班潛在顧客好啦！
聽聽下係咪覺得有啲心動呢？我哋會介紹幾個市面上最受歡迎嘅工具比大家，不過留意翻，未必每個都啱你用架。想知道點揀先啱、揀嘅時候又有啲咩需要注意嘅地方？咁你就要留意我哋下一個blog啦！下次小編會同大家一齊睇睇市面上幾個最受歡迎嘅營銷軟件，你點可以錯過呢？