上次我哋同大家分享過AARRR增長漏斗，喺呢個漏斗嘅第一步「獲取客戶」入面，小編提到吸引顧客嘅途徑有好多種，包括經由搜尋引擎（search engine）搜索到你嘅公司從而幫襯。
今次，我哋集中講搜尋引擎最佳化（search engine optimisation），SEO係數碼營銷人員必須掌握嘅技巧之一，佢係指透過自然、唔依靠落廣告嘅方式，掌握搜尋引擎嘅運作規則嚟改善網站排名，令到網站係搜尋引擎嘅曝光提高。
做SEO都有唔少地方要注意架，而SEO策略多數分為站內（on-page）同站外（off-page），即刻等我哋嚟睇下站內同站外分別有啲咩策略啦！
站內最佳化（On-page SEO）
站內最佳化最主要受網站本身網站內部嘅元素影響，一般策略包括改善網站內容、加入關鍵字、建立內部連結（internal links）等等，當然仲有一啲IT層面嘅因素啦，例如係網址結構、網站速度等等。
先講下關鍵字方面嘅策略，唔少企業都選擇以內容營銷嚟做SEO，但係並唔係每篇文章都可以提升網站嘅排名架。希望撰寫一篇對SEO有利嘅文章，我哋必須要制定寫作框架，當中要選取一啲合適嘅關鍵字，提高關鍵字喺篇文出現嘅頻率，咁先可以令到篇文喺搜尋引擎排得比較前，但係當然唔係盲目重複關鍵字就可以啦！因為Google曾經係2013年推出一個叫Hummingbird嘅演算法，用以打擊一啲過分利用相同關鍵字嘅網站，所以我哋要適可而止，唔可以過度投放關鍵字。
選取關鍵字方面，我哋可以利用喺Google搜尋時所提供嘅延伸搜索去幫助我哋得到更多Google認為有關嘅關鍵字。例如，如果你想寫一篇有關「海外升學」嘅文章，咁你可以喺Google搜尋「海外升學」之後用空白鍵隔一隔，就可以搵到一啲Google建議嘅延伸字眼啦。
同時，Google搜索頁面最底部嘅同樣有一堆延伸關鍵字可以俾大家參考。呢啲字都可以被視為長尾關鍵字（long tail keywords），所指嘅就係原生關鍵字所產生出嚟但流量比較低嘅關鍵字。當我哋網站唔夠競爭力嘅時候，我哋就要搵一啲長尾嘅關鍵字，以呢個情況嚟講，「海外升學顧問」會比「海外升學」相對少競爭，所以可以分佈一啲呢類嘅關鍵字係文章當中。
網站結構方面，我哋需要確保一個網站裏面有好多內部連結，將一個網站嘅唔同頁面環環緊扣咁連埋一齊，就好似以下嘅一張圖咁。
最簡單係寫文章嘅時候，當提及到嘅內容同網站嘅其他頁面有相關性嘅時候，就可以利用錨點文字（Anchor Text），去到將兩個頁面相連起嚟。以我哋以前出過嘅文章為例，我哋嘅網站都有做到相關嘅內部連結建立，從而去令到我哋嘅網站內部嘅緊密性提高。
此外，嵌入多媒體內容嚟豐富文章內容除咗有利搜尋引擎嘅最佳化，都可以吸引訪客逗留更耐。由於單純得文字嘅文章容易令人造成閱讀疲累，亦可能因為太過單調刻板而令到訪客放棄閱讀。透過加入相片、影片、圖表或者數據等等嘅多媒體，唔單止可以豐富你嘅內容，仲可以提高訪客喺網站當中嘅停留時間，從而增加佢哋分享網站而獲得外部連結嘅機會。
站外最佳化（Off-page SEO）
站外最佳化指嘅係除左自己網站以外所有導向你網站嘅流量來源，可以係你嘅社交媒體或者係其他網址咁，呢啲就係外部連結（backlink）啦。
外部連結呢個字，相信行銷人員都唔會對佢感到陌生，外部連結即係一啲由其他網站連接入你網站嘅連結。不過並唔係所有反向連結都必定對SEO有作用，要注意相關嘅連結都有質量之分。一啲較具權威嘅連結，例如係政府網站、新聞平台同教育機構網站等等，遠遠比起權威性較低嘅網站更有利搜尋引擎最佳化。由此可見，就好似你網站推薦人一樣，建立外部連結可以話係重質唔重量。
另外，即使獲得有權威嘅外部連結，但若果嗰個網站同埋你自身網站內容嘅相關程度較低嘅話，所起嘅作用亦都會冇咁大。小編建議大家最好以搵一啲同自身網站內容較相關嘅網站作為目標，更值得一提嘅係坊間雖然有唔少提供外部連結購買服務嘅網站，但係無論點都好，千祈唔好用錢買外部連結，因為Google喺2012年曾經推出Penguin嘅演算法去打壓購買外部連結嘅網站，所以買連結係會適得其反，甚至會損害你公司係搜尋引擎嘅排名。
搜尋引擎最佳化（Search engine optimization）係近年好多公司用嚟獲取客戶嘅自然途徑，不過要做好SEO真係好需要時間，因為佢唔似落廣告咁可以短時間內獲取大量客戶，不過只要比心機，相信你公司一定可以係搜尋引擎排到一個理想嘅位置。