最近偷情新聞成為城中熱話，各大品牌紛紛抽水，男朋友們應該亦更常被女朋友問道「如果係你，你會點做？」「你會唔會出去偷食？」
講起上嚟，人嘅疑心真係好重，為咗監控，可以去到好盡。成日都會見到唔同嘅追蹤APP，追蹤家人、伴侶位置、甚至係老闆掌控員工行蹤等……根據《路透社》報導，美國家庭追蹤應用程式「Life360」計劃喺澳洲上市，如果成事嘅話，將會係歐洲近3年以來最大宗嘅科技新股！可想而知，依啲監控追蹤App真係好有市場，今日就為大家介紹下依個科技新貴「Life360」！
‘At its heart Life360 is about family. Knowing they’re safe is the most important thing.’
「Life360」最大目的係希望連繫家庭，家人之間知道更易大家喺邊，確保佢哋嘅安全。
關於創作起源，Life360嘅製作團隊就表示，因為我哋經常都會問身邊人「你喺邊？」「你做緊咩？」，有研究更顯示我哋每日都會有大約6至8次嘅問答係關於我哋現時位置，所以，Life360製作團隊就希望可以製作一個追蹤APP，以後唔洗再問，只要打開個app，就可以知得一清二楚。
▲「Life360」希望可以透過追蹤APP，確保家人安全和保持聯繫。
「Lift360」對於有小朋友同埋長者嘅家庭嚟講都幾實用㗎！小朋友返學時，家長可以check到子女係咪順利到達；老人家晨運時，亦可以打卡報平安。除咗GPS功能外，用家甚至可以設定pop-up提示功能，當佢哋一進入或者離開指定範圍，就會收到提示，第一時間知道佢哋幾時放工放學或者幾時返到屋企！除此之外，付費版嘅Life360仲會提供每個區份嘅犯罪報告，提醒邊到有報警，等家長可以隨時提高警覺！
如果屋企人、朋友、另一半識揸車，你唔單止可以知道佢哋揸車嘅路線，仲可以透過Life360知道佢哋有冇危險駕駛添！當佢哋超速、急停或者一路揸車一路玩手機，Life360都會紀錄低，當架車真係咁唔好彩爆胎或者發生意外，咁你都可以採取相應嘅緊急應變措施。
向來，監控APP最大嘅爭議都係用家嘅私隱問題，「Life360」亦絕對明白依點，因此，只有對方確認邀請之後，先至可以被追蹤，而且，仲可以設定只有特定嘅Circle先會收到你位置資料，或者，直接關咗追蹤功能佢添！（不過，依個又會衍生另一個問題啦：係咪作賊心虛啊？)
當然啦，雖然依個App係主打家庭，不過朋友之間都可以下載既，郊遊嘅時候除咗可以防走失，更可以Check下對方係咪真係轉個彎就到！如果你擔心另一半出軌嘅話，都可以用佢嚟監察伴侶（小編相信Life360嘅1800萬位用家當中，有唔少人都係咁做！ ）
除咗「Life360」依類家庭追蹤求安心嘅APP之外，市場為咗滿足疑心重嘅受眾，又出現咗一啲專為情侶甚至老細而設嘅追蹤APP。情侶方面，有啲APP除咗簡單追蹤地理位置之外，更可以檢查佢所有來電同信息，無論係手機短訊、email定係社交媒體Facebook或者Skype上面嘅活動、甚至喺邊到影咗咩相、通通都無所遁形!
唔好以為咁樣已經好瘋狂，老細監督員工方面亦都十分誇張。一啲追蹤APP甚至瘋狂到推出統計員工步數嘅功能，以步數監督員工，邊個偷懶，邊個勤力，一睇就知。而且，更設有同部門員工嘅步數排行榜，引發同事之間競爭，真係想逼死員工!
▲日本應用程式「Cyzen」推出以步數監督員工的功能，引起爭議
–
人同人之間嘅信任真係好脆弱，本來為安心而下載嘅追蹤APP，最後好多愈用愈霸權，成為咗監控或者監督嘅工具……無論係家人、朋友、伴侶，甚至上司下屬都好，都要講求信任，無論點都好，都要尊重對方嘅私隱。係信嘅，佢做啲咩你都會信佢；係唔信嘅，就算你追蹤完佢，都會懷疑佢係咪搞小動作呃緊你。追蹤APP有好大市場，好多人都好受落，但下唔下載，都係交比你自己同身邊嘅人自己決定啦！
相關文章:
【透過指尖可分析喜怒哀樂？】
【AI app預測到你有幾長命?】
【AI監視器幫手捉賊仔! 】
【解構旅行必備嘅GPS系統！】