六十年代開始，心臟病係香港嘅頭號殺手之一，而心臟病之中，冠心病最為普遍，平均每日都有11人死於冠心病，都咪話唔得人驚！對末期患者嚟講，心臟移植係唯一對付心臟病嘅辦法，但係心臟捐贈者少之又少，心臟供不應求，平均等候時間需要六至八個月，令唔少心臟病患者都係輪候心臟移植嘅時候逝世。 不過，依個問題似乎好快可以得以解決啦！
唔知大家仲記唔記得，之前同大家介紹過，美國有研究團體利用3D列印打造仿生眼同仿生耳 (詳情) ，依家，以色列更有研究團體成功利用3D列印打造出首個人工心臟，為醫學發展帶來一大突破！
喺上個月15號，Tel Aviv University嘅生活科學學者係Wiley Online Library宣布咗佢哋對於3D打印心臟嘅研究結果（完整學術文章），研究結果顯示，個人化嘅水凝膠可以用嚟印刷完整嘅心臟。其實喺以往，已經有好多團隊嘗試利用3D打印嚟列印心臟，但由於未能列印細胞或血管，所以都未能成功。
而今次依個心臟係由病人自己嘅細胞結合水凝膠而成，所以可以完美咁配合病人嘅免疫、生化、構造等等，消除植入物被免疫系統排斥嘅風險。
所謂水凝膠，其實係由病患者細胞入面嘅各種蛋白質所製嘅，打印嘅時候，水凝膠就會成為我地打印嘅墨；而含有病患基因嘅細胞，就會分裂為打印所需嘅心臟細胞，打印機會根據心臟嘅結構，打造出一模一樣嘅人工心臟！
雖然依個人工心臟只有兔仔嘅心臟咁大，而且只識得收縮，同人類實際所需嘅心臟仲係有啲差距，但依項研究證明咗用3D打印人造心臟係可行，係醫學嘅一大突破！學者表示，將來會專注於打印人類心臟大小、可以獨立運作嘅3D打印心臟到，一旦成功，就會喺動物身上嘗試心臟移植。睇嚟不久嘅將來，我哋就唔洗再擔心心臟短缺嘅問題，令更多心臟病人可以得救！
其實除咗醫療方面之外，3D打印技術喺各方面都有好多用處㗎！就好似我哋曾經介紹過嘅3D打印房屋咁。3D打印技術愈來愈成熟，睇嚟以後將會帶來更多更多元化嘅發展！
–
相關文章:
【AI app預測到你有幾長命?】
【3D列印有望打造出仿生眼？】
【世上首張3D彩色X光片面世？】
【16歲少女研發AI App，快速診斷眼病！】