內容行銷(content marketing)可以話係「集客式行銷」(inbound marketing)嘅核心,透過上載同品牌有關而且有趣並具資訊性嘅內容,將自己打造成為一個領域專家,同時有效提升你嘅品牌知名度。以下我哋會提供五大Content Marketing嘅小貼士,等你可以成功咁推廣自己嘅品牌。
1. 質量兼備(Quality and Quantity)
今時今日做content marketing,除咗重視質素之外,量都好重要。係同一個題材上,如果做到海量嘅內容,比起耐唔耐先出一次,會更容易俾人感覺到你係嗰個領域嘅知識有幾廣泛,例如美國嘅Entrepreneur on Fire就正正係每日堅持訪問一位企業家(entrepreneur),令佢係內容嘅數量上遠遠多於佢嘅競爭者。
要落實推出海量嘅內容呢個計畫,你需要建立一個內容日曆(content calendar),係呢個日歷列出晒一個星期七日入面要推出嘅內容,最好定時喺社交媒體(social media)或者自己嘅網站(website)上載有質素嘅內容,從而起引受眾對你品牌嘅注意。
2. 建立關鍵績效指標(Establishing KPIs)
為求令你嘅content marketing達到目標,最佳嘅方法就係令佢變得可以衡量(measurable)。具體啲講,即係為你嘅內容營銷設置關鍵績效指標(Key Performance Indicator/ KPI)。建立 KPI能夠為你提供一個可以追溯嘅里程碑來幫助你了解幾時先可以達到目標,佢哋可以包括喺銷售、流量、Search Engine Optimization(SEO)嘅分數、數字營銷等各個方面,例如係電子郵件營銷同社交媒體指標方面實現嘅目標。以下係小編覺得頗為重要嘅KPIs:
瀏覽量(Pageviews)
你知唔知道當一個用戶撳入你啲Blog之後,佢會睇完即刻離開定係會睇多幾篇呢?要知道答案,其實只要使用合適嘅追踪工具,例如Google Analytics,去追蹤Pageviews。了解Pageview可以幫你設計出更適合讀者嘅內容,甚至可以鼓勵潛在客戶(Leads)click入內部鏈接並進一步探索你品牌嘅產品,咁利潤其實都會隨之而來架!如果Pageviews夠高、瀏覽量不斷飆升,就代表你嘅受眾對你提供嘅大部分內容感興趣啦。相信久而久之,你漸漸會獲得讀者對你嘅信任,而你嘅品牌亦都會成功被打造為行業入面嘅專家。
跳出率(Bounce rate)
Bounce rate所指嘅係到達頁面後,立即離開頁面嘅用戶百分比。換而言之,呢個數字當然係越低越好啦。當呢個比率好高嘅時候,一般因為兩個原因:第一,blog嘅組織結構可能唔夠方便用戶閱讀或者觀感唔夠吸引,舉個例,可能網站嘅排版唔適用係手機版,導致好多使用手機嘅用戶其實根本唔能夠閱讀;第二,文章內容同佢哋嘅期望有出入,就好似你撳入嚟呢一篇blog之後假如發現內容同content扯唔上關係,你都好可能會選擇直接離開網站,所以我哋要僅記唔可以貨不對辦呀。
流量來源 (Source of traffic)
以上兩個KPIs都與公司嘅網站有關,可以話係你可以完全控制嘅指標。流量就唔同啦,從流量來源嘅數據,我哋可以得知內容喺互聯網各個平台上嘅表現。佢主要顯示通往你發佈嘅內容嘅所有途徑同埋佢哋之間嘅差異,例如自然搜尋(organic search)、社交媒體(social media)、付費廣告(paid advertisement)、電子郵件、直接連結到你website嘅link等等。最理想嘅情況當然係少啲依賴付費廣告,始終用金錢去換流量並唔係長遠之計,累積更多自然嘅來源(organic source)先係上上策。
3. 推出具創意嘅內容(Creative Content)
網絡世界瞬息萬變,一啲搞笑嘅事情好容易喺曝光冇耐之後就會引起好多人嘅關注,當引起全城熱話之後,有啲公司會好迅速咁乘勢推岀抽水式內容回應。以幾年前嘅Pokemon Go為例,佢係推出當日差唔多所有網絡內容創作者都抽Pokemon Go水,由screenshot到公司實況、手機配備、遊戲攻略同埋安全提示,甚至係任天堂嘅股價消息等等都不斷被轉載,有啲品牌更加借呢件事抽水嚟hard sell 自己嘅product,但當然呢一樣野我哋唔太建議,因為始終content marketing 嘅目的唔係hard sell,而且軟性推廣。
無獨有偶,舊年備受全城關注嘅安心偷食事件,係曝光冇耐就有公司即時攞嚟抽水做content marketing,九巴(KMB)係二十四小時內就係佢哋Facebook 專頁出咗一張利用老鼠偷食做題材,用以呼籲大家唔好係車廂入面食嘢嘅post。因為事件主角之一嘅許志安有個花名叫老鼠安,所以九巴小編就用咗佢哋偷食嘅事件製作呢個十分有創意嘅抽水式content,最終引嚟網民極大嘅迴響,總共獲得高達27K個like,反映出engagement十分可觀。
![【話比大家聽你係專家:五個內容營銷小貼士】 1 Screenshot 2020 12 31 at 11.33.14 AM](https://www.juicyapp.com/wp-content/uploads/2021/01/Screenshot-2020-12-31-at-11.33.14-AM-696x1024.png)
4. 良好視覺效果(Good Viusal)
根據Skyword嘅調查,係做content marketing嘅時侯,一啲包含圖片嘅blog嘅表現比冇類似圖片嘅文章好94%,所以無論你寫啲咩,加上一啲靚嘅visuals遠比只寫一大堆字好。視覺衝擊一向係廣告嘅有效策略,尤其喺資訊爆炸嘅年代,圖像嘅訊息就會係云云文字中更加突出。
除咗製作普通嘅graphics,其實好多公司都會推出infographic去更具體咁樣傳達呢個訊息,例如著名外國傳媒機構路透社就曾經推出一張infographic去講解有關G20國家對女性權益嘅重視。雖然infographic嘅設計所需嘅經驗同技巧甚至係需時都比普通嘅graphics多同耐,因為佢唔似簡單嘅改圖,而係需要更多嘅資料搜集,但係好多大品牌嘅公司都會配合佢嚟出content,所以呢個行銷策略應該都會繼續成為一個趨勢。
![【話比大家聽你係專家:五個內容營銷小貼士】 2 Screenshot 2020 12 31 at 12.08.29 PM](https://www.juicyapp.com/wp-content/uploads/2021/01/Screenshot-2020-12-31-at-12.08.29-PM.png)
5. 最佳的內容頻道(Right Channel)
最後,選擇最適合嘅平台亦係marketers需要留意嘅嘢。一般嚟講,Facebook、Instagram 同埋LinkedIn係最普及地用嚟推廣content嘅平台,不過細心嘅你肯呢過留意到有部份B2B(business-to-business)嘅公司就忽略Instagram只係側重係Facebook同LinkedIn上嘅宣傳,例如香港貿易發展局,咁到底點解呢?主要因為Instagram嘅用戶大部分係年輕人或者青少年,而唔係上班一族嘅白領人士或者商界領袖,所以嗰啲公司唔想花費太多資源係Instagram推廣,而想集中火力做好B2B導向嘅平台。
事實上,除咗用邊個平台,點樣有效利用嗰個平台做content marketing 亦都值得我哋關注。以Instagram 為例,除咗頭先講嘅用家主要係年青人之外,其實佢亦都係一個視覺主導嘅平台,因為佢出貼文一定要出一張相,唔可以只有captions,更重要嘅係佢有Facebook同LinkedIn都冇嘅獨特功能,就係輪播貼文(carousel),俾用家可以出一系列嘅相,而好多公司,尤其係市場營銷機構(marketing agency)就會用嚟出一啲提示貼文,配合埋廣告有時可以得到唔錯嘅reach架。
總括嚟講,內容營銷係近年可以話係大行其道。有研究指出有90%嘅機構都係利用內容取代廣告去做行銷,更有分別超過90%嘅B2B行銷人員同超過80%嘅B2C行銷人員都花接近30%嘅成本係內容上。要做好內容營銷,記得要應用上述所提及嘅五大策略啦。假以時日,相信你嘅企業最終一定可以加強曝光率,為你帶嚟可觀嘅生意額。